吴若希（Jinny）与老公何兆鸿（Alex）喺2017年结婚，育有一子一女，虽然经常晒恩爱又孖住出席朋友聚会，但吴若希经常公审老公。早前，吴若希不满老公突然积极车女同事返工，于是连发4帖公审老公，当中包括对话截图，更指：「其实呢，女人呢係好敏感嘅，你趷起条尾，都已经知你会做咩㗎」，仲叫老公唔好畀人影到。然而，近日吴若希为张驰豪（Aska）网上节目《Aska驰房》担任嘉宾，除咗叫Aska除衫之外，更重提老公载女同事返工一事。

吴若希与Aska于节目上烹调菠菜卡邦尼意粉，二人讲起第一次接触係喺TVB校园剧集《青春本我》，吴若希提到第一次对Aska有印象係因为二人属同一个经理人，当时经理人叫佢拣一个人合唱，于是吴若希喺众多人选中拣咗Aska。到节目尾声，Aska问起吴若希对上一次公审老公事件，吴若希指佢哋长期都係咁：「我哋长期都係处于嗌交、离婚同埋被离婚嘅阶段」，续指每次嘈交都係认真，笑言：「我哋唔係玩，我哋每一次嘈交都係认真，哈哈哈，嘈交係一件好认真嘅事，但係九成时间其实我哋无嘈交。」 听到Aska唔知点回应。吴若希又指，每次讨论都係激烈，每次温柔畀建议老公唔好咁做，但对方就会发脾气，表示自己当刻嬲都好正常，不过佢又暗嘲：「谂返转头觉得佢其实係一个非常友善嘅人，我而家喺屋企整咗个奖座畀佢，有佢个样，就係表扬佢成为一个最佳好老闆，好似对上一次佢好想车女同事返工咁样，可能以前我唔明，但係我而家明白，其实老公係需要Support，佢既然觉得呢件事咁啱嘅话，我哋更加要畀一个好大嘅奖励佢，等佢记住你做呢件事係啱嘅，希望全世界都称讚佢，真係好好啊，为咗激嬲老婆，坚持车女同事返工，呢样嘢无得顶」。Aska问到吴若希会否畀更大空间老公去做佢认为啱嘅事，吴若希直言一定会，仲透露帮对方买咗部新车：「嗰架七人车嚟，咁到时佢锺意车几多个女同事都冇问题啦，我真係绝世好老婆」。Aska听完之后除咗笑，仲表示要定定惊。

按此下载全新 APP，睇尽最新娱乐新闻、乐坛消息、名人热话、热门电影、Netflix剧评，新人更可换领限量新人礼，立即下载！